మే 28న విడుదల కానున్న శ్రద్ధాదాస్ మైథలాజికల్ థ్రిల్లర్ ‘త్రికాల’

శ్రద్ధాదాస్ ప్రధాన పాత్రలో నటిస్తున్న మైథలాజికల్ ఫిక్షనల్ థ్రిల్లర్ “త్రికాల” ప్రస్తుతం సినీ ప్రేక్షకుల్లో ఆసక్తిని రేకెత్తిస్తోంది. భారతీయ సనాతన ధర్మంలో దాగి ఉన్న ఆధ్యాత్మిక రహస్యాలను ఆధారంగా చేసుకుని రూపొందిన ఈ చిత్రం మే 28న ప్రపంచవ్యాప్తంగా విడుదలకు సిద్ధమవుతోంది. దర్శకుడు మణి తెల్లగూటి రూపొందించిన ఈ చిత్రంలో మాస్టర్ ఫేమ్ Mahendran, Ajay, సీనియర్ నటి Aamani కీలక పాత్రల్లో నటించారు. రాధిక–శ్రీనివాస్ నిర్మించిన ఈ చిత్రాన్ని చాగంటి ప్రొడక్షన్ LLP ప్రపంచవ్యాప్తంగా విడుదల చేస్తోంది.

ఇప్పటికే విడుదలైన ట్రైలర్, పాటలు, ప్రచార చిత్రాలు సినిమాపై అంచనాలను మరింత పెంచాయి. ముఖ్యంగా అడవి నేపథ్యంలో తెరకెక్కించిన విజువల్స్, హైఎండ్ VFX, వెన్నులో వణుకు పుట్టించే బ్యాక్‌గ్రౌండ్ స్కోర్ ప్రేక్షకులను బాగా ఆకట్టుకుంటున్నాయి. సాధారణ హారర్ కథలా కాకుండా, దైవిక శక్తులు మరియు అతీత శక్తుల మధ్య జరిగే సంఘర్షణను థ్రిల్లింగ్ ఎలిమెంట్స్‌తో మిళితం చేసి దర్శకుడు ఈ చిత్రాన్ని రూపొందించినట్లు ట్రైలర్ ద్వారా అర్థమవుతోంది. “అమ్మ” పాట భావోద్వేగాన్ని కలిగిస్తూ సినిమాపై మరింత ఆసక్తిని పెంచగా, శ్రద్ధాదాస్ కొత్త లుక్, మహేంద్రన్ యాక్షన్ సన్నివేశాలు, అజయ్ పవర్‌ఫుల్ పాత్ర సినిమాపై క్యూరియాసిటీని పెంచుతున్నాయి.

ఈ సందర్భంగా దర్శకుడు మణి తెల్లగూటి మాట్లాడుతూ, ప్రపంచంపై చీకటి కమ్ముకున్న సమయంలో వెలుగుగా అవతరించే ఒక శక్తి చుట్టూ “త్రికాల” కథ సాగుతుందని తెలిపారు. సనాతన ధర్మంలోని కొన్ని ఆధ్యాత్మిక అంశాలను ఆధునిక థ్రిల్లింగ్ నెరేషన్‌తో మిళితం చేసి ఈ చిత్రాన్ని రూపొందించామని, ప్రేక్షకులకు ఇది సరికొత్త అనుభూతిని అందిస్తుందని అన్నారు. నిర్మాతలు కూడా ఈ సినిమా సంస్కృతి, ఆధ్యాత్మికత, థ్రిల్ అంశాల సమ్మేళనంగా అన్ని వర్గాల ప్రేక్షకులను ఆకట్టుకుంటుందని విశ్వాసం వ్యక్తం చేశారు.

ఈ చిత్రానికి Harshavardhan Rameshwar సంగీతం అందిస్తున్నారు. “అర్జున్ రెడ్డి”, “అనిమల్”, “స్పిరిట్” వంటి చిత్రాలకు తన సంగీతంతో ప్రత్యేక గుర్తింపు తెచ్చుకున్న ఆయన అందించిన బ్యాక్‌గ్రౌండ్ స్కోర్ “త్రికాల”కు ప్రధాన బలంగా నిలుస్తుందని చిత్రబృందం చెబుతోంది. ఇప్పటికే ఈ సినిమాకు నార్త్ ఇండియాలో కూడా మంచి బిజినెస్ జరిగిందని, హిందీ శాటిలైట్ మరియు డబ్బింగ్ హక్కులు ఫ్యాన్సీ రేటుకు అమ్ముడైనట్లు సమాచారం.

టాలీవుడ్‌లో “సిద్ధు ఫ్రమ్ శ్రీకాకుళం”తో హీరోయిన్‌గా పరిచయమైన శ్రద్ధాదాస్, “ఆర్య 2”, “గుంటూరు టాకీస్”, “డిక్టేటర్”, “నాగవల్లి” వంటి చిత్రాలతో ప్రత్యేక గుర్తింపు సంపాదించుకుంది. ఇప్పుడు “త్రికాల”లో ఆమె మరో విభిన్నమైన పాత్రలో కనిపించబోతుండటంతో అభిమానుల్లో ఆసక్తి నెలకొంది. మొత్తంగా మైథలాజికల్ థ్రిల్లర్ జానర్‌లో రూపొందిన “త్రికాల” మే 28న ప్రేక్షకులకు ఒక కొత్త సినీ అనుభూతిని అందించేందుకు సిద్ధమవుతోంది.