‘ఇరుముడి’ మూవీ రివ్యూ: ఎమోషన్‌తో రవితేజ కంబ్యాక్.. తండ్రి–కూతురు బంధం హృదయాన్ని తాకేలా!

మాస్ మహారాజ్ రవితేజ, శివ నిర్వాణ కాంబినేషన్‌లో తెరకెక్కిన ‘ఇరుముడి’ భారీ అంచనాల మధ్య ఈరోజు ప్రేక్షకుల ముందుకు వచ్చింది. రెగ్యులర్ కమర్షియల్ సినిమాలకు భిన్నంగా తండ్రి–కూతురు అనుబంధం, అయ్యప్ప దీక్ష, ఆడపిల్లల రక్షణ వంటి అంశాలను కలిపి దర్శకుడు శివ నిర్వాణ ఈ చిత్రాన్ని తెరకెక్కించారు. విడుదలకు ముందే సినిమాపై మంచి బజ్ ఉండగా.. ఫస్ట్ షో తర్వాత ప్రేక్షకుల నుంచి పాజిటివ్ స్పందన వస్తోంది.

కథేంటి?

‘ఇరుముడి’లో రవితేజ త్రినాథ్ అనే లారీ డ్రైవర్ పాత్రలో కనిపిస్తారు. మద్యానికి బానిసైనప్పటికీ తన భార్య, కూతురితో కలిసి ప్రశాంతంగా జీవించే వ్యక్తి అతను. అతని జీవితంలో కూతురు మణెమ్మ అంటే ప్రాణం. అయితే గ్రామంలో ఆడపిల్లలకు ఎదురయ్యే ప్రమాదం అతని కుటుంబాన్ని కూడా తాకుతుంది.

తన కూతురికి ఎదురైన సమస్యతో త్రినాథ్‌లోని తండ్రి బయటకు వస్తాడు. తన కూతురిని, గ్రామంలోని ఇతర ఆడపిల్లలను కాపాడేందుకు అతను చేసే పోరాటమే సినిమా ప్రధాన కథ. ఈ క్రమంలో మద్యానికి బానిసైన త్రినాథ్ అయ్యప్ప మాల ధరించి తన జీవితాన్ని మార్చుకోవడం కథలో కీలకమైన అంశంగా నిలుస్తుంది.

రవితేజ నటన

‘ఇరుముడి’లో రవితేజ తన రెగ్యులర్ మాస్ ఇమేజ్‌కు పూర్తి భిన్నంగా కనిపించారు. త్రినాథ్ పాత్రలో ఆయన నటన చాలా సెటిల్డ్‌గా ఉంటుంది. ముఖ్యంగా కూతురితో వచ్చే ఎమోషనల్ సన్నివేశాల్లో రవితేజ నటన ప్రేక్షకులను ఆకట్టుకుంటుంది.

మాస్ హీరోగా రవితేజను చూసిన అభిమానులకు ఈ పాత్ర కొత్త అనుభూతిని ఇస్తుంది. మాస్ సీన్లతో పాటు భావోద్వేగ సన్నివేశాలను కూడా ఆయన చక్కగా బ్యాలెన్స్ చేశారు. రవితేజ కెరీర్‌లో ఇది ఒక విభిన్నమైన పాత్రగా నిలిచే అవకాశం ఉంది.

బేబీ నక్షత్ర అదుర్స్

రవితేజ కూతురిగా నటించిన బేబీ నక్షత్ర సినిమాకు మరో ప్రధాన బలం. తండ్రి–కూతురు మధ్య వచ్చే సన్నివేశాలు సినిమాకు మంచి ఎమోషనల్ డెప్త్ తీసుకొచ్చాయి. ముఖ్యంగా సెకండాఫ్‌లో వీరిద్దరి మధ్య వచ్చే సన్నివేశాలు ప్రేక్షకులను కదిలించేలా ఉన్నాయి.

శివ నిర్వాణ టేకింగ్

సున్నితమైన భావోద్వేగాలను తెరపై బలంగా చూపించడంలో శివ నిర్వాణ తన మార్క్ చూపించారు. కుటుంబ బంధాన్ని ప్రధానంగా తీసుకున్నప్పటికీ యాక్షన్, సామాజిక అంశాలు, అయ్యప్ప దీక్షను కథలో మిళితం చేసిన విధానం ఆసక్తికరంగా ఉంది.

సినిమా కొన్ని చోట్ల నెమ్మదిగా అనిపించినప్పటికీ, బలమైన ఎమోషనల్ సన్నివేశాలు ఆ లోటును భర్తీ చేస్తాయి. ముఖ్యంగా సెకండాఫ్‌లో కథనం మరింత ఆసక్తికరంగా మారుతుంది. క్లైమాక్స్ సినిమాకు కీలకమైన హైలైట్‌గా నిలుస్తుందని తొలి స్పందనలు చెబుతున్నాయి.

ప్లస్ పాయింట్స్

• రవితేజ నటన

• తండ్రి–కూతురు ఎమోషన్

• బేబీ నక్షత్ర పెర్ఫార్మెన్స్

• సెకండాఫ్

• క్లైమాక్స్

• బలమైన సామాజిక అంశం

• శివ నిర్వాణ టేకింగ్

మైనస్ పాయింట్స్

• కొన్ని చోట్ల నెమ్మదించే కథనం

• రెగ్యులర్ మాస్ ఎంటర్‌టైనర్ ఆశించే వారికి కొన్ని సన్నివేశాలు భిన్నంగా అనిపించొచ్చు

చివరిగా..

‘ఇరుముడి’ రెగ్యులర్ రవితేజ మాస్ సినిమా కాదు. తండ్రి–కూతురు అనుబంధాన్ని ప్రధానంగా తీసుకుని భావోద్వేగాలు, యాక్షన్, సామాజిక సందేశాన్ని కలిపిన సినిమా. రవితేజ కొత్త తరహా పాత్రలో ఆకట్టుకోగా, బేబీ నక్షత్ర తన నటనతో మెప్పించింది. సెకండాఫ్, క్లైమాక్స్ సినిమాకు ప్రధాన బలంగా నిలిచాయి.

మాస్ ఎలిమెంట్స్‌తో పాటు మంచి ఎమోషనల్ కథను కోరుకునే ప్రేక్షకులకు ‘ఇరుముడి’ ఒక మంచి ఛాయిస్.

రేటింగ్:  3.5/5