‘కొత్త మలుపు’ కథలో ప్రతి మలుపు ఆసక్తికరం: హీరో ఆకాష్ గోపరాజు

జూన్ 12న ప్రేక్షకుల ముందుకు రానున్న ‘కొత్త మలుపు’ సినిమాపై ఆసక్తి రోజురోజుకీ పెరుగుతోంది. ప్రముఖ గాయని సునీత కుమారుడు ఆకాష్ గోపరాజు హీరోగా నటించిన ఈ చిత్రం కోనసీమ నేపథ్యంలో తెరకెక్కిన రొమాంటిక్ లవ్ అండ్ సస్పెన్స్ ఎంటర్‌టైనర్. దర్శకుడు శివ వరప్రసాద్ కేశనకుర్తి రూపొందించిన ఈ సినిమా టైటిల్‌కు తగ్గట్టే కథలో ఊహించని మలుపులు ఉంటాయని హీరో ఆకాష్ గోపరాజు తెలిపారు. తన తొలి చిత్రం ‘సర్కారు నౌకరి’తో పోలిస్తే ‘కొత్త మలుపు’ పూర్తిగా భిన్నమైన జానర్‌లో రూపొందిందని, ప్రేమ, వినోదం, భావోద్వేగాలు, సస్పెన్స్ అంశాలు ప్రేక్షకులను ఆకట్టుకుంటాయని చెప్పారు. ప్రముఖ దర్శకుడు ఏ. కోదండరామిరెడ్డి ఈ చిత్రానికి ‘కొత్త మలుపు’ అనే టైటిల్ సూచించడం విశేషం.

సినిమాలో తన పాత్ర యువతకు దగ్గరగా ఉండేలా రూపొందిందని ఆకాష్ వెల్లడించారు. నటన పరంగా మరింత మెరుగ్గా కనిపించేందుకు ప్రత్యేక శ్రద్ధ తీసుకున్నానని, సీనియర్ల సూచనలతో పాటు తల్లి సునీత ఇచ్చిన సలహాలు తనకు ఎంతో ఉపయోగపడ్డాయని చెప్పారు. దర్శకుడు కథ చెప్పినప్పుడే అందులోని ట్విస్టులు తనను బాగా ఆకట్టుకున్నాయని, ప్రేక్షకులు కూడా కథలో వచ్చే మలుపులను ఊహించలేరని పేర్కొన్నారు. కోనసీమ అందాలను అందంగా చూపిస్తూ కమర్షియల్ అంశాలతో కథను ఆసక్తికరంగా తెరకెక్కించారని అన్నారు.

ఈ చిత్రానికి మైత్రి మూవీ డిస్ట్రిబ్యూటర్స్ మద్దతు లభించడం తమకు పెద్ద బలమని ఆకాష్ అభిప్రాయపడ్డారు. కంటెంట్‌పై నమ్మకంతోనే వారు సినిమాను విడుదల చేస్తున్నారని, దీని వల్ల సినిమా మరింత మంది ప్రేక్షకులకు చేరుకుంటుందని ఆశాభావం వ్యక్తం చేశారు. హీరోయిన్ భైరవి అర్ధ్యాతో తన కెమిస్ట్రీ కూడా ప్రేక్షకులను ఆకట్టుకుంటుందని, బావ-మరదళ్ల పాత్రల్లో ఇద్దరి మధ్య వచ్చే సరదా సన్నివేశాలు వినోదాన్ని పంచుతాయని చెప్పారు.

సినిమా చూసిన తర్వాత తల్లి సునీత ఎంతో సంతోషించారని, అవుట్‌పుట్ చాలా బాగుందని ప్రశంసించారని ఆకాష్ తెలిపారు. కథల ఎంపిక విషయంలో పూర్తి స్వేచ్ఛ ఇస్తూనే ఎప్పుడూ తనకు అండగా నిలుస్తుందని చెప్పారు. నిర్మాత తాటి బాలకృష్ణ ఎక్కడా రాజీ పడకుండా సినిమాను నిర్మించారని, ప్రతి ఫ్రేమ్‌లోనూ నాణ్యత కనిపించేలా ప్రొడక్షన్ విలువలను మెయింటైన్ చేశారని వెల్లడించారు.

రఘుబాబు, పృథ్వీరాజ్, ప్రభావతి వంటి అనుభవజ్ఞులైన నటులు కీలక పాత్రలు పోషించిన ఈ చిత్రానికి యశ్వంత్ నాగ్ సంగీతం అందించారు. ప్రేమ, కుటుంబ భావోద్వేగాలు, వినోదం, సస్పెన్స్ అంశాల సమ్మేళనంగా రూపొందిన ‘కొత్త మలుపు’ ప్రేక్షకులకు కొత్త అనుభూతిని అందిస్తుందనే నమ్మకంతో చిత్రబృందం ఉంది. తొలి చిత్రం ‘సర్కారు నౌకరి’ తర్వాత ఆకాష్ గోపరాజు కెరీర్‌లో మరో కీలక చిత్రంగా భావిస్తున్న ‘కొత్త మలుపు’ విడుదలకు ముందే మంచి చర్చనీయాంశంగా మారింది.