జూన్ 12న ‘పోలీస్ కంప్లైంట్’ రిలీజ్.. చిత్ర యూనిట్‌కు ఆదిశేషగిరిరావు అభినందనలు

జూన్ 12న ప్రేక్షకుల ముందుకు రానున్న ‘పోలీస్ కంప్లైంట్’ చిత్రంపై రోజురోజుకీ అంచనాలు పెరుగుతున్నాయి. హారర్, యాక్షన్, థ్రిల్లర్ అంశాలను సమపాళ్లలో మేళవిస్తూ రూపొందిన ఈ చిత్రాన్ని క్రియేటివ్ డైరెక్టర్ సంజీవ్ మేగోటి తెరకెక్కించగా, ఎంఎస్‌కే ప్రమిద శ్రీ ఫిలిమ్స్ బ్యానర్‌పై బాలకృష్ణ మహారాణా నిర్మించారు. ఇప్పటికే విడుదలైన ట్రైలర్, ప్రచార గీతాలు ప్రేక్షకుల్లో ఆసక్తిని పెంచగా, తాజాగా సూపర్‌స్టార్ కృష్ణకు నివాళిగా రూపొందించిన ప్రత్యేక గీతం మరింత ఆకర్షణగా నిలిచింది. ఈ పాటను వీక్షించిన సూపర్‌స్టార్ కృష్ణ సోదరుడు ఘట్టమనేని ఆదిశేషగిరిరావు చిత్ర యూనిట్‌ను అభినందించడం విశేషం. పాట అద్భుతంగా ఉందని ప్రశంసించిన ఆయన, సినిమా ఘన విజయాన్ని సాధించాలని ఆకాంక్షించారు.

ఈ సందర్భంగా దర్శకుడు సంజీవ్ మేగోటి మాట్లాడుతూ, ఆదిశేషగిరిరావు గారి ప్రశంసలు తమ చిత్ర బృందానికి ఎంతో ప్రోత్సాహాన్ని ఇచ్చాయని తెలిపారు. ‘చైన్ రియాక్షన్ ఆఫ్ కర్మ’ అనే వైవిధ్యమైన కాన్సెప్ట్‌తో తెరకెక్కిన ఈ చిత్రాన్ని 52 మంది సీనియర్ ఆర్టిస్టులతో కేవలం 45 రోజుల్లో పూర్తి చేశామని చెప్పారు. హారర్, థ్రిల్లర్‌తో పాటు యాక్షన్, ఎమోషన్స్ ప్రేక్షకులను కొత్త అనుభూతికి గురిచేస్తాయని పేర్కొన్నారు.

హీరో కృష్ణసాయి మాట్లాడుతూ, సూపర్‌స్టార్ కృష్ణ గారిపై రూపొందించిన ప్రత్యేక గీతంలో నటించడం తనకు దక్కిన అదృష్టంగా భావిస్తున్నానన్నారు. ఆ పాటను ఆదిశేషగిరిరావు గారు మెచ్చుకోవడం ఎంతో ఆనందాన్ని కలిగించిందని చెప్పారు. దర్శకుడు సంజీవ్ మేగోటి సినిమాను అద్భుతంగా తెరకెక్కించారని, ఈ చిత్రం ప్రేక్షకుల ఆదరణతో పెద్ద విజయాన్ని అందుకుంటుందనే నమ్మకం వ్యక్తం చేశారు.

నవీన్ చంద్ర, వరలక్ష్మి శరత్‌కుమార్, కృష్ణసాయి, రాగిణి ద్వివేది ప్రధాన పాత్రల్లో నటించిన ‘పోలీస్ కంప్లైంట్’ హారర్, యాక్షన్, కామెడీ, రొమాన్స్, థ్రిల్లర్ అంశాల సమ్మేళనంగా రూపొందింది. ట్రైలర్‌తో పాటు ప్రత్యేక గీతాలకు కూడా మంచి స్పందన రావడంతో ఈ సినిమాపై ప్రేక్షకుల్లో ఆసక్తి నెలకొంది. ఆదిశేషగిరిరావు ఆశీర్వాదాలు తోడవడంతో ‘పోలీస్ కంప్లైంట్’ విడుదలకు ముందే మరింత పాజిటివ్ బజ్‌ను సొంతం చేసుకుంది.